ឯកឧត្តមឯកអគ្គរាជទូត ចូលជួបសម្ដែងការគួរសម និងជម្រាបលា សម្ដេចតេជោ ប្រធានព្រឹទ្ធសភាកម្ពុជា បញ្ជាក់អំពីទំនាក់ទំនងដ៌ស្អិតរមួតរវាងកម្ពុជា-ថៃ

 

នាថ្ងៃទី០៣ ខែកញ្ញា ឆ្នាំ២០២៤ ឯកឧត្តមឈើតកៀត អត្ថាករ ឯកអគ្គរាជទូតនៃព្រះរាជាណាចក្រថៃប្រចាំព្រះរាជាណាចក្រកម្ពុជា បានអញ្ជើញចូលជួបសម្ដែងការគួរសម និងជម្រាបលា សម្តេចអគ្គមហាសេនាបតីតេជោ ហ៊ុន សែន ប្រមុខរដ្ឋស្តីទី និងប្រធានព្រឹទ្ធសភា នៃព្រះរាជាណាចក្រកម្ពុជា ក្នុងឱកាសដែលឯកឧត្តមនឹងបញ្ចប់អាណត្តិបេសកកម្មការទូត ដោយភាគីទាំងពីរបានពិភាក្សាអំពីទំនាក់ទំនងដ៏ស្អិតរមួត និងកិច្ចសហប្រតិបត្តិការយ៉ាងជិតស្និតនូវគ្រប់វិស័យ ដែលបានលើកកម្ពស់ទំនាក់ទំនងជាដៃគូយុទ្ធសាស្ដ្រ។ បន្ថែមពីនេះ កិច្ចពិភាក្សាបានផ្តោតទៅលើកិច្ចសហប្រតិបត្តិការក្នុងវិស័យផ្សេងៗ ទៀតផងដែរ ដូចជា ពាណិជ្ជកម្ម ការបណ្ដាក់ទុន ភាពជិតស្និតខាងផ្នែកវប្បធម៌ ការគាំទ្រផ្នែកទេសចរណ៍ កិច្ចសហប្រតិបត្តិការដើម្បីការអភិវឌ្ឍ និងការជំរុញក្របខណ្ឌកិច្ចសហប្រតិបត្តិការកម្រិតតំបន់ ដូចជា យុទ្ធសាស្រ្តកិច្ចសហប្រតិបត្តិការសេដ្ឋកិច្ច អាយ៉េយ៉ាវ៉ាឌី-ចៅប្រាយ៉ា-មេគង្គ (ACMECS) និងអាស៊ានជាដើម។