ស្ថានទូតថៃប្រចាំកម្ពុជា ស្វែងរកមធ្យោបាយនៅក្នុងការជំរុញការតភ្ជាប់សេដ្ឋកិច្ចរូបបែបថ្មីនៅតំបន់ព្រំដែនកម្ពុជា -ថៃ ដាក់គោលដៅតភ្ជាប់ខ្សែចង្វាក់ផ្គត់ផ្គង់ថ្នាក់តំបន់

ឯកឧត្តម ឈើតគៀត អត្ថាករ ឯកអគ្គរាជទូតថៃប្រចាំកម្ពុជា ចូលជួបពិភាក្សាការងារជាមួយឯកឧត្តមបណ្ឌិត សុក ស៊ីផាន់ណា ទេសរដ្ឋមន្ត្រីទទួលបន្ទុកបេសកកម្មពិសេស (Senior Minister in charge of special affairs: Multilateral Trade and Economic Affairs) កាលពីថ្ងៃទី ១ មីនា ២០២៤ ដើម្បីពិភាក្សាស្វែងរកមធ្យោបាយ និងកិច្ចសហប្រតិបត្តិការជាផ្លែផ្កានៅក្នុងការតភ្ជាប់តំបន់សេដ្ឋកិច្ចពិសេសបរិវេណព្រំដែននៃប្រទេសទាំងពីរ (complimentary special economic zones) ដើម្បីលើកកម្ពស់ផលប្រយោជន៍រវាងគ្នាទៅវិញទៅមកអោយកាន់តែខ្លាំងឡើងថែមទៀត ជាពិសេសការបង្កើននូវទំហំពាណិជ្ជកម្មនិងការវិនិយោគ និងគាំទ្រវិស័យឧស្សាហកម្មរបស់ប្រទេសទាំងពីរ។

 

ភាគីទាំងពីរបានពិភាក្សាផងដែរអំពីសក្តានុពលនៃការតភ្ជាប់នូវខ្សែចង្វាក់ផ្គត់ផ្គង់នៅក្នុងតំបន់ (regional supply chain connectivity and integration) មានជាអាទិ៍ (១) ការបង្កលក្ខណៈងាយស្រួលចំពោះការធ្វើពាណិជ្ជកម្ម និងការវិនិយោគរវាងគ្នាទៅវិញទៅមក (២) ការជំរុញការតភ្ជាប់នូវបណ្ដាញគមនាគមន៍ដឹកជញ្ជូន ភស្តុភារនិងហេដ្ឋារចនាសម្ព័ន្ធ និង(៣) ការតភ្ជាប់ក្នុងវិស័យឧស្សាហកម្ម និង SMEs របស់ប្រទេសទាំងពីរ ដោយប្តេជ្ញានៅក្នុងការបង្កើតក្រុមការងាររួមគ្នាដើម្បីជំរុញនូវមធ្យោបាយសម្រាប់កិច្ចសហប្រតិបត្តិការអោយកើតចេញជាផ្លែផ្កា៕