ស្ថានទូតថៃប្រចាំកម្ពុជា ប្ដេជ្ញាចិត្តគាំទ្រឲ្យវិស័យឯកជនថៃនៅកម្ពុជាផ្ដោតសំខាន់លើចីរភាព និងការតបស្នងជូនសង្គមកម្ពុជាវិញជាបន្តបន្ទាប់

 

ឯកឧត្តម ឈើតគៀត អត្ថាករ ឯកអគ្គរាជទូតថៃប្រចាំកម្ពុជាអមដោយមន្ត្រីរាជការនៃស្ថានទូតថៃប្រចាំកម្ពុជា បានចូលរួមកម្មវិធីសប្បុរសធម៌ (CSR) ដាំដើមឈើស្ដារធម្មជាតិ នៅក្នុងបរិវេណរោងចក្រ K Cement ខេត្តកំពត ដែលកម្មវិធីខាងលើរៀបចំឡើងជាប្រចាំដោយក្រុមហ៊ុន K Cement ជាក្រុមហ៊ុនក្នុងសម្ព័ន្ធក្រុមហ៊ុន អេស ស៊ី ជី កម្ពុជា ដែលផ្តោតសំខាន់លើការអភិវឌ្ឍធុរកិច្ចតាមគន្លង ESG (Environmental, Social and Governance) ដែលយកចិត្តទុកដាក់ចំពោះបរិស្ថាន សង្គម និងអភិបាលកិច្ច ដែលជាផ្នែកមួយដ៏សំខាន់នៅក្នុងការចូលមកប្រកបធុរកិច្ចនៅក្នុងប្រទេសកម្ពុជា។

 

លោក រ៉ាត់ឆាយុទ្ធ ក្សេមឆ្ឆ័យសិរិ នាយកសម្ព័ន្ធក្រុមហ៊ុន អេស ស៊ី ជី កម្ពុជា បញ្ជាក់សារជាថ្មីអំពីគន្លងបែបបទនៃការធ្វើធុរកិច្ចរបស់ក្រុមហ៊ុន K Cement នៅកម្ពុជាជំរុញដោយ ESG ដែលនឹងជួយបង្កើនការធ្វើធុរកិច្ចឲ្យកាន់តែរីកចម្រើនប្រកបដោយចីរភាព ដោយមានការគ្រប់គ្រងធុរកិច្ចដែលមានលក្ខណៈល្អប្រសើរនិងស្អាតស្អំ គ្រប់គ្រងនូវហានិភ័យសង្គម និងបរិស្ថានប្រកបដោយប្រសិទ្ធភាព ហើយជាពិសេសនោះគឺគិតដល់អ្នកដែលរងផលប៉ះពាល់ទាំងវិជ្ជមាន និងអវិជ្ជមានដែលនៅជុំរិញ៕