ស្ថានទូតថៃប្រចាំកម្ពុជាគាំទ្រវិស័យឯកជនថៃនៅកម្ពុជាបង្កើនសន្ទុះនៅក្នុងការពង្រីកទីផ្សារផលិតផលអាហារថៃដែលមានគុណភាពនៅក្នុងទីផ្សារកម្ពុជាដែលជាប្រទេសជិតខាង

 

ឯកឧត្តម ឈើតកៀត អត្ថាកន ឯកអគ្គរាជទូតថៃប្រចាំកម្ពុជា ព្រមជាមួយមន្ត្រីរាជការនៃស្ថានទូតថៃប្រចាំកម្ពុជា និងក្រុមគ្រួសារបានអញ្ញើញចូលរួមបើកកម្មវិធីពិព័រណ៍អាហារ និងភេសជ្ជៈថៃ (Thai Food and Beverage Festival) ប្រចាំឆ្នាំ ២០២៤ នៅផ្សារទំនើបម៉ាក្រូ សាខាសែនសុខ ដើម្បីជំរុញការផ្គត់ផ្គង់ផលិតផលអាហារ និងភេសជ្ជៈថៃដែលប្រកបដោយគុណភាពជាច្រើនមុខ ព្រមទាំងជាការជំរុញនូវនិមិត្តសញ្ញានៃផលិតផលថៃក្នុងទីផ្សារប្រទេសកម្ពុជាដែលជាប្រទេសជិតខាងមានភាពស្និតស្នាល និងជាការជួយបង្កើននូវទំហំពាណិជ្ជកម្មរវាងប្រទេសទាំងពីរឲ្យរីកចម្រើនទៅព្រមៗគ្នាផងដែរ។

 

កម្មវិធីពិព័រណ៍អាហារ និងភេសជ្ជៈថៃក្នុងឆ្នាំនេះមានផលិតផលដែលចូលរួមតាំងពិព័រណ៍ក្នុងតម្លៃពិសេសរហូតដល់ ៩០០ មុខ ព្រមជាមួយនិងកម្មវិធីពិសេសផ្សេងៗទៀតមាន ដូចជា ការលក់អាហារថៃចម្អិនស្រស់ៗនៅបរិវេណខាងមុខផ្សារទំនើប ការរៀបចំឲ្យមានការភ្លក្សចំនីអាហារ និងកម្មវិធីចាប់ឆ្នោតផ្សងសំណាងជាច្រើនផ្សេងទៀត ដែលអាចចាត់ទុកបានថាជាកម្មវិធីលក្ខណៈគ្រួសារ។

 

កម្មវិធី Thai Food and Beverage Festival នាឱកាសនេះនឹងរៀបចំរហូតដល់ថ្ងៃទី ១៦ ខែមិថុនានេះ នៅផ្សារទំនើបម៉ាក្រូគ្រប់សាខា៕