កាលពីថ្ងៃ ២ មីនា ២០២៣ ឯកឧត្តម ឈើតកៀត អត្ថាករ ឯកអគ្គរាជទូតនៃព្រះរាជាណាចក្រថៃប្រចាំកម្ពុជា បានដឹកនាំសហការីចូលជួបសម្តែងការគួរសមឯកឧត្តម ថោង ខុន រដ្ឋមន្ត្រីក្រសួងទេសចរណ៍ នៅក្នុងឱកាសដែលឯកឧត្តមចូលបំពេញតួនាទីការទូតថ្មី។

ភាគីទាំងពីរបានពិភាក្សាទាក់ទងការជំរុញនូវកិច្ចសហប្រតិបត្តិការក្នុងវិស័យទេសចរណ៍អោយកាន់តែស្និតរមួតខ្លាំងឡើងថែមទៀត ដោយមើលឃើញថាការបង្កលក្ខណៈងាយស្រួលឲ្យប្រជាជននៃប្រទេសទាំងពីរធ្វើដំណើរទៅមកបានកាន់តែងាយស្រួលខ្លាំងឡើង ជាកត្តាដ៏ចំបាច់នៅក្នុងការជំរុញវិស័យទេសចរណ៍រវាងប្រទេសទាំងពីរ ជាងនេះទៅទៀតឯកឧត្តមឯកអគ្គរាជទូតបានសម្តែងនូវជំហរក្នុងការគាំទ្រការធ្វើជាម្ចាស់ផ្ទះព្រឹត្តិការណ៍កីឡាស៊ីហ្គេមឆ្នាំ ២០២៣ របស់កម្ពុជា ហើយជឿជាក់ថាជាព្រឹត្តិការណ៍នេះនឹងជំរុញចំណងមិត្តភាពនិងសាមគ្គីភាពរបស់បណ្ដាប្រទេសនៅក្នុងតំបន់ ហើយថែមទាំងជាឱកាសនៅក្នុងការជំរុញនូវវិស័យទេសចរណ៍រវាងប្រទេសទាំងពីរនៅក្នុងអំឡុងពេលនោះផងដែរ៕