កាលពីថ្ងៃទី ៧ ខែកុម្ភៈ ឆ្នាំ ២០២៥ កន្លងមកនេះ ស្ថានទូតថៃប្រចាំកម្ពុជាបានរៀបចំកម្មវិធីបង្កើតបណ្ដាញរវាងថ្នាក់ដឹកនាំគ្រឹះស្ថានអប់រំថៃ និងសមាគមឧត្តមសិក្សាកម្ពុជា (Cambodian Higher Education Association: CHEA) ព្រមជាមួយគ្រឹះស្ថានអប់រំដែលជាសមាជិកនៃសមាគម ដើម្បីពង្រឹងកិច្ចសហប្រតិបត្តិការរវាងគ្នាទៅវិញទៅមក ដោយមានឯកឧត្តម ទុល្យ ត្រៃសូរ៉ាត់ ឯកអគ្គរាជថៃប្រចាំកម្ពុជា ជាអធិបតីនៅក្នុងកម្មវិធី និងមានវត្តមានប្រធាន និងថ្នាក់ដឹកនាំ CHEA និងសកលវិទ្យាល័យពីប្រទេសថៃ និងកម្ពុជាជាង 170 នាក់ បានអញ្ជើញចូលរួម។

នៅក្នុងឱកាសខួបគម្រប់ ៧៥ ឆ្នាំនៃការស្ថាបនាទំនាក់ទំនងការទូតរវាងព្រះរាជាណាចក្រថៃ និងកម្ពុជានៅក្នុងឆ្នាំ ២០២៤ នេះ ឯកឧត្តមឯកអគ្គរាជទូត បានសង្កត់ធ្ងន់ចំពោះតួនាទីសំខាន់របស់គ្រឹះស្ថានអប់រំនៅក្នុងកិច្ចសហប្រតិបត្តិការក្នុងវិស័យអប់រំ និងទំនាក់ទំនងរវាងប្រជាជន និងប្រជាជន ដែលជាមូលដ្ឋានគ្រឹះដ៏សំខាន់សម្រាប់វិស័យផ្សេងៗទៀត មិនថាតែជាវិស័យពាណិជ្ជកម្ម វិនិយោគ និងទេសចរណ៍។

ក្រៅពីនេះ ឯកឧត្តមឯកអគ្គរាជទូត បានស្នើឲ្យគ្រឹះស្ថានអប់រំនៃប្រទេសទាំងពីរពិចារណាកិច្ចសហប្រតិបត្តិការវាងគ្នាទៅវិញទៅមកមិនថាតែការផ្លាស់ប្តូរសិស្សនិស្សិត សាស្ត្រាចារ្យ ទស្សនកិច្ចសិក្សា ការរៀបចំកម្មវិធីសិក្សានិងការស្រាវជ្រាវរួមគ្នា និងសូមឲ្យវិស័យឯកជនពិចារណាបង្កើនចំនួនអាហារូបករណ៍ ឬរួមចំណែកចូលរួមផ្តល់ការហាត់ការដើម្បីហ្វឹកហាត់ការងារ ឬទស្សនកិច្ចសិក្សានៅក្រុមហ៊ុនឬរោងចក្ររបស់លោក-លោកស្រី នៅក្នុងឱកាសសំខាន់ដូចដែលបានបញ្ជាក់ជូនខាងលើផងដែរ។

នៅក្នុងឱកាសនេះផងដែរ ស្ថានទូតថៃប្រចាំកម្ពុជា ក៏បានធ្វើបទបង្ហាញពីប្រធានបទផ្សេងៗ ជូនដល់អ្នកចូលរួមកម្មវិធីខាងលើ មានជាអាទិ៍ “ការដាក់ពាក្យស្នើសុំ e-Visa សម្រាប់ការបន្តការសិក្សានៅប្រទេសថៃ” ដោយក្រុមការងារផ្នែកកុងស៊ុល និង “ការតភ្ជាប់ឱកាស” ដោយការិយាល័យជំរុញពាណិជ្ជកម្មអន្តរជាតិប្រចាំកម្ពុជា និងសមាគមអ្នកធុរកិច្ចថៃនៅកម្ពុជា (TBCC) រួមគ្នារិះរកមធ្យោបាយពង្រឹងកិច្ចសហប្រតិបត្តិការរវាងថៃ - កម្ពុជា បានដោយវិធីណា? ដោយលោក និរ៉ាវ៉ាត់ រង្ស៊ីកាន អគ្គទីប្រឹក្សាផ្នែកពាណិជ្ជកម្ម និង លោកស្រី ជីរ៉ាណាន់ វង្សមង្គល ប្រធាន TBCC ៕