————

 

ឯកអគ្គរាជទូតថៃប្រចាំកម្ពុជា ចូលជួបសម្តែងការគួរសមរដ្ឋមន្ត្រីក្រសួងសាធារណការ និងដឹកជញ្ជូន បញ្ជាក់ជំហរការប្ដេជ្ញាចិត្តនៅក្នុងការតភ្ជាប់គ្នាដោយមិនមានស្លាកស្នាមតំណរ (Seamless Connectivity) ក្នុងវិស័យគមនាគមន៍ ដឹកជញ្ជូន និងហេដ្ឋារចនាសម្ព័ន្ធរវាងថៃ និងកម្ពុជា

 

កាលពីថ្ងៃទី ១៩ ខែកញ្ញា ឆ្នាំ២០២៤ ឯកឧត្តមឈើតកៀត អត្ថាករ ឯកអគ្គរាជទូតថៃប្រចាំកម្ពុជា បានចូលជួបនិងជម្រាបលា ឯកឧត្តម ប៉េង ពោធិ៍នា រដ្ឋមន្ត្រីក្រសួងសាធារណការ និងដឹកជញ្ជូន។

 

ភាគីទាំងពីរបានពិភាក្សាអំពីការអភិវឌ្ឍហេដ្ឋារចនាសម្ព័ន្ធគមនាគមន៍ ដឹកជញ្ជូនរវាងគ្នាទៅវិញទៅមក ដោយឯកឧត្តមឯកអគ្គរាជទូតបានបញ្ជាក់ជាថ្មីម្ដងទៀតអំពីសារសំខាន់នៃការតភ្ជាប់ផ្លូវដែក ជាពិសេសការបើកឲ្យដំណើរការរថភ្លើងឆ្លងកាត់ព្រំដែនថៃ - កម្ពុជា រវាងម៉ាបតាភុត - ខ្លងលឹក - ប៉ោយប៉ែត - ភ្នំពេញ ដើម្បីបំពេញតម្រូវការដឹកជញ្ជូនពាណិជ្ជឲ្យបានកាន់តែឆាប់រហ័ស ព្រមទាំងបានជម្រាបអំពីវឌ្ឍនភាពនៃការកសាងអគារទីស្នាក់ការគយរបស់ភាគីថៃ នៅច្រកស្ពានមិត្តភាពថៃ - កម្ពុជា (បានណងអៀន - ស្ទឹងបត់)។ ម្យ៉ាងវិញទៀតនោះបច្ចុប្បន្ននេះភាគីទាំងពីរក៏កំពុងពិភាក្សាលើគម្រោងលើកកម្ពស់ផ្លូវជាតិសំខាន់ចំនួន ២ ខ្សែគឺ ផ្លូវជាតិលេខ ៦៧ ច្រកសាងាំខេត្តស៊ីសាកេត - ខេត្តសៀមរាប និងផ្លូវជាតិលេខ ៦៨ ច្រកចម ខេត្តសុរិន្ទ - ក្រឡាញ់ ខេត្តសៀមរាប ដើម្បីបង្កភាពងាយស្រួលក្នុងការធ្វើដំណើរ និងបង្កើនសកម្មភាពពាណិជ្ជកម្មឆ្លងកាត់ព្រំដែនរវាងថៃ និងកម្ពុជា។

 

ឯកឧត្តម ប៉េង ពោធិ៍នា រដ្ឋមន្ត្រីក្រសួងសាធារណការ និងដឹកជញ្ជូនបានថ្លែងអំណរគុណរាជរដ្ឋាភិបាលថៃដែលបានផ្តល់កិច្ចសហប្រតិបត្តិការនៅក្នុងការអភិវឌ្ឍហេដ្ឋារចនាសម្ព័ន្ធជូនកម្ពុជា និងបង្ហាញនូវការត្រៀមលក្ខណៈសម្បត្តិនៅក្នុងការជំរុញការតភ្ជាប់ដោយមិនមានស្លាកស្នាមនៃតំណររវាងប្រទេសទាំងពីរ៕