ឯកអគ្គរាជទូតថៃប្រចាំកម្ពុជា ចូលក្រាបថ្វាយបង្គុំគាល់ថ្វាយអង្ករចំនួន ៣ តោន ក្នុងព្រះរាជពិធីបុណ្យចម្រើនព្រះជន្មព្រះមហាក្សត្រ នៃព្រះរាជាណាចក្រកម្ពុជា

នាថ្ងៃទី ១៧ ឧសភា ២០២៤ ព្រះករុណាព្រះបាទសម្តេចព្រះបរមនាថ នរោត្តម សីហមុនី ព្រះមហាក្សត្រ នៃព្រះរាជាណាចក្រកម្ពុជា ជាទីគោរពសក្ការៈដ៏ខ្ពង់ខ្ពស់ ព្រះអង្គសព្វព្រះរាជហឫទ័យព្រះបរមរាជានុញ្ញាតប្រោសព្រះរាជទានជូនឯកឧត្តមឯកអគ្គរាជទូតនៃព្រះរាជាណាចក្រថៃ និងសហការីចូលក្រាបថ្វាយបង្គុំគាល់ ដើម្បីទូលថ្វាយព្រះពរបវរមហាប្រសើរ និងក្រាបទូលថ្វាយនូវអង្ករចំនួន ៣ តោន ដើម្បីព្រះករុណាព្រះមហាក្សត្រប្រើសម្រាប់ភារកិច្ចតាមព្រះរាជហឫទ័យ នៅក្នុងថ្ងៃចម្រើនព្រះជន្ម នាថ្ងៃទី ១៤ ឧសភា ២០២៤ កន្លងទៅ។

 

ព្រមជាមួយគ្នានេះដែរ ឯកឧត្តមឯកអគ្គរាជទូតបានទូលថ្វាយជាវត្ថុអនុស្សាវរីយ៍ជាគំនូរធ្វើពីអង្ករដែលជាស្នាដៃសិល្បៈរបស់កូនខ្មែរ រចនានិងធ្វើចេញជានិមិត្តរូបអបអរសាទរការស្ថាបនាទំនាក់ទំនងការទូតរវាងកម្ពុជា និងថៃគម្រប់ ៧៤ ឆ្នាំ ដែលជាការសបញ្ជាក់នូវភាពជាដៃគូរដើម្បីសន្តិភាព ភាពរីកចម្រើន និងការអភិវឌ្ឍរួមគ្នារបស់ប្រជាជននៃយើងទាំងពីរ៕