ស្ថានទូតថៃ ប្រចាំកម្ពុជា បានរៀបចំកម្មវិធី Thailand Education and Jobs Fair 2025 នៅក្នុងឱកាសអបអរសាទរខួបគម្រប់ ៧៥ ឆ្នាំនៃការស្ថាបនាទំនាក់ទំនងការទូតរវាងថៃ និងកម្ពុជា

កាលពីថ្ងៃទី ៨ ខែកុម្ភៈ ឆ្នាំ ២០២៥ ស្ថានទូតថៃ ប្រចាំព្រះរាជាណាចក្រកម្ពុជា រួមសហការជាមួយអតីតនិស្សិតបញ្ចប់ការសិក្សាពីប្រទេសថៃ និង Go Study Thailand បានរៀបចំពិព័រណ៍ “Thailand Education and Jobs Fair 2025” ធ្វើឡើងនៅ The Connexion កោះពេជ្រ រាជធានីភ្នំពេញ ដោយកម្មវិធីក្នុងឆ្នាំនេះធ្វើឡើងក្រោមមូលបទ “Together for a Better Future” ដើម្បីអបអរសាទរខួបគម្រប់ ៧៥ ឆ្នាំ នៃការស្ថាបនាទំនាក់ទំនងការទូតរវាងថៃ និងកម្ពុជា។

នៅក្នុងកម្មវិធីពិព័រណ៍ខាងលើមានវត្តមានគ្រឹះស្ថានអប់រំរបស់ថៃចំនួន ១៩ បានចូលរួម តំណាងផ្តល់ការប្រឹក្សាយោបល់ក្នុងវិស័យអប់រំចំនួន ៥ និងធុរកិច្ចថៃនៅកម្ពុជាចំនួន ២៥ បានអញ្ជើញចូលរួម ដែលបានផ្តល់ឱកាសដល់យុវជនកម្ពុជាជំនាន់ក្រោយបានជួបពិភាក្សាផ្ទាល់ សាកសួរព័ត៌មានការបន្តការសិក្សាលើមុខជំនាញផ្សេងៗនៅប្រទេសថៃ ព្រមទាំងឱកាសនៅក្នុងការដាក់ពាក្យធ្វើការ និងប្រកបអាជីពក្នុងថ្ងៃអនាគត ក្រៅពីនេះអាចចួលរួមស្តាប់កិច្ចពិភាក្សា បង្កើតបណ្ដាញជាមួយអ្នកជំនាញ ដោយមានអ្នកចូលរួមប្រមាណ ៦០០ នាក់ ដែលជាសិស្សនិស្សិត និងអ្នកដែលកំពុងស្វែងរកការងារធ្វើដែលសុតសឹងតែជាអ្នកមានមូលដ្ឋានគ្រឹះ និងគុណសម្បត្តិសម្រាប់ការងារលើវិស័យជាច្រើន។

ក្រៅពីនេះ ស្ថានទូតថៃប្រចាំកម្ពុជា មានកិត្តិយសបានការអញ្ជើញចូលរួមពីសំណាក់ឯកឧត្តមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំ យុវជន និងកីឡា នៃព្រះរាជាណាចក្រកម្ពុជា ជាភ្ញៀវកិត្តិយសអញ្ជើញថ្លែងសន្ទរកថាបើកកម្មវិធីរួមជាមួយលោកស្រី អេកអន ឃុណាចារ៉ើន ភារធារី នៃស្ថានទូតថៃប្រចាំកម្ពុជា៕