ឯកអគ្គរាជទូតថៃប្រចាំកម្ពុជា ចូលជួបសម្តែងការគួរសមនាយករដ្ឋមន្ត្រីកម្ពុជា សង្កត់ធ្ងន់នូវទំនាក់ទំនងថៃ - កម្ពុជាឲ្យកាន់តែស្និតរមួតលើគ្រប់វិស័យ ព្រមទាំងបង្កើនសន្ទុះនៃទំនាក់ទំនងឲ្យក្លាយទៅជាដៃគូរយុទ្ធសាស្ដ្ររវាងគ្នាទៅវិញទៅមក (Strategic Partnership)

 

នៅព្រឹកថ្ងៃទី ១៩ ខែកញ្ញា ឆ្នាំ ២០២៤ នេះ ឯកឧត្តមឈើតកៀត អត្ថាករ ឯកអគ្គរាជទូតថៃប្រចាំកម្ពុជា បានចូលជួបសម្តែងការគួរសមសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា ក្នុងឱកាសដែលឯកឧត្តមបញ្ចប់បេសកកម្មការទូតនៅកម្ពុជា។

 

ឯកឧត្តមឯកអគ្គរាជទូតបានកោតសរសើរចំពោះការដឹកនាំរបស់សម្តេចនាយករដ្ឋមន្ត្រីនៅក្នុងការជំរុញកម្ពុជាឆ្លងកាត់អន្តរកាលនយោបាយបានយ៉ាងមានស្ថេរភាព និងការស្ដារសេដ្ឋកិច្ចកម្ពុជាក្រោយវិបត្តិកូវីត ១៩ ព្រមទាំងសង្កត់ធ្ងន់ចំពោះទំនាក់ទំនងរវាងថៃនិងកម្ពុជាដែលមានការរីកចម្រើនលើគ្រប់វិស័យនិងមានភាពរឹងមាំនៅគ្រប់កម្រិត ព្រមទាំងបង្កើនសន្ទុះនៃទំនាក់ទំនងឲ្យក្លាយទៅជាដៃគូរយុទ្ធសាស្ដ្ររវាងគ្នាទៅវិញទៅមក។

 

ប្រធានបទសំខាន់នៅក្នុងជំនួបនេះ មានដូចជា ការពន្លឿននូវការជំរុញការធ្វើពាណិជ្ជកម្ម ការវិនិយោគរបស់អ្នកធុរកិច្ចនៃប្រទេសទាំងពីរ ការបង្កើតនូវការតភ្ជាប់គ្នាដោយមិនមានស្លាកស្នាម ជាពិសេសការតភ្ជាប់ផ្លូវដែករវាងគ្នាទៅវិញទៅមក ការជំរុញទេសចរណ៍ក្រោមគោលនយោបាយ Two Kingdoms, One Destination ការផ្តោតសំខាន់លើការបង្កលក្ខណៈងាយស្រួលក្នុងការឆ្លងដែន និងកិច្ចសហប្រតិបត្តិការដើម្បីអភិវឌ្ឍជាពិសេសការអភិវឌ្ឍន៍ធនធានមនុស្ស ដើម្បីបង្កើននូវទំនាក់ទំនងរវាងប្រជាជនឲ្យកាន់តែជិតស្និតខ្លាំងឡើងថែមទៀត រួមទាំងការមើលថែនិងផ្តល់ការការពារជនជាតិថៃនៅកម្ពុជា។

 

សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រី បានថ្លែងអំណរគុណចំពោះឯកឧត្តមឯកអគ្គរាជទូត ដែលបានខិតខំប្រឹងប្រែងបំពេញតួនាទីយ៉ាងអស់ពីសមត្ថភាព និងបានរួមចំណែកយ៉ាងសំខាន់នៅក្នុងការបង្កើននូវទំនាក់ទំនងរវាងថៃនិងកម្ពុជា ឲ្យកាន់តែស្អិតរមួតឲ្យខ្លាំងឡើងថែមទៀតលើគ្រប់វិស័យ និងសូមឲ្យបន្តនូវការរួមចំណែកបង្កើនទំនាក់ទំនងរវាងថៃនិងកម្ពុជាដូចនេះបន្តទៀត ដោយនៅក្នុងពេលបច្ចុប្បន្នកិច្ចសហប្រតិបត្តិការរវាងប្រទេសទាំងពីរមានភាពល្អប្រសើរជាខ្លាំង។ ក្រៅពីនេះភាគីទាំងពីរថែមទាំងបានពិភាក្សាស្វែងរកមធ្យោបាយបង្កភាពងាយស្រួលក្នុងការធ្វើពាណិជ្ជកម្ម វិនិយោគតាមរយៈការអភិវឌ្ឍន៍ហេដ្ឋរចនាសម្ព័ន្ធ និងការតភ្ជាប់តំបន់សេដ្ឋកិច្ចពិសេសរវាងប្រទេសទាំងពីរ (Complimentary Economic Zones) ដើម្បីបង្កើនទំហំពាណិជ្ជកម្មឆ្លងកាត់ព្រំដែន និងតភ្ជាប់ខ្សែចង្វាក់ផ្គត់ផ្គង់ ព្រមទាំងកិច្ចសហប្រតិបត្តិការក្នុងវិស័យទេសចរណ៍ ជាពិសេសការគាំទ្រវិស័យឯកជនក្នុងការស្វែងរក និងធ្វើទីផ្សារថ្មីៗរួមគ្នា។

 

ក្នុងឱកាសនេះសម្តេចនាយករដ្ឋមន្ត្រីកម្ពុជាបានបំពាក់គ្រឿងឥស្សរិយយសសហមេត្រី ថ្នាក់មហាសិរីវឌ្ឍន៍ជូនចំពោះឯកឧត្តមឯកអគ្គរាជទូត ដើម្បីជាការសម្តែងនូវក្តីរីករាយចំពោះកិច្ចខិតខំប្រឹងប្រែងរបស់ឯកឧត្តមនៅសម្រាប់ការបំពេញតួនាទីកន្លងមកក្នុងការជំរុញនូវទំនាក់ទំនងរវាងថៃនិងកម្ពុជាលើគ្រប់វិស័យ៕